ՀՀ տարածքային կառավարման և զարգացման նախարարությունը նախատեսում է 32 խոշորացված համայնք ձևավորել՝ շուրջ 380 և ավելի համայնքների միավորման արդյունքում։ Լրագրողների հետ զրույցում ՀՀ  տարածքային կառավարման և զարգացման նախարար Դավիթ Լոքյանն ասաց, որ ըստ ՀՀ վարչատարածքային բաժանման մասին օ րենքի նախագծի` խոշորացման գործընթացը տեղի կունենա ՀՀ 8 մարզերում, նախատեսվում է միավորել 384 համայնք։ Նախարարը հավելեց, որ նախարարության համար բազմաթիվ օրենսդրական փոփոխություններից հետո կարևոր հարց են մնում երեք առանցքային խնդիրներ։

«Օրենսդրական բարեփոխումների առաջին խնդիրներից մեկը Միջհամայնքային միավորումների մասին ՀՀ օրենքի նախագիծն է։ Յուրաքանչյուր համայնք առանձնացնում է իր ուրույն գործառույթները, ինչը բերում է մեծ ծախսատարության, ոչ ակնկալելի արդյունքների: Նոր նախագծով համայնքային ծառայություններ իրականացնելու խնդրին մենք օրենքի տեսք ենք տալիս»,- նշեց նախարարը։

Երկրորդ կարևոր օրենսդրական խնդիրը, որն առկա է, Համայնքային ծառայության մասին օրենքն է։

«Մենք ունենք այդ օրենքը, որը, գուցե, ժամանակին լավն է եղել, անհրաժեշտ է եղել կայացման սկզբնական փուլում, բայց այն լիարժեք չի ապահովում համայնքային ծառայողների մասնագիտական կրթությունը, նրանց աշխատանքի ընդունումը։ Արդյունքում,  շատ համայնքներում տեսնում ենք բազմաթիվ անկատար ծառայություններ, որոնց պատճառը մարդկային կապիտալի բացակայությունն է»,- շեշտեց նախարար Լոքյանը և հավելեց, որ երրորդ և հիմնական օրենքը, որն արդեն շրջանառության մեջ է դրվել, Հայաստանի Հանրապետության վարչատարածքային բաժանման մասին օրենքն է։
Նյութի աղբյուր՝http://www.1in.am