Ես համաձայնեցի, որ ցույց տամ մեր հանրությանը, որ ոստիկանությունն իսկապես կանգնած է մեր ժողովրդի կողքին», - այսօր կառավարության նիստից հետո լրագրողների հետ ճեպազրույցում ասաց Հայաստանի նորանշանակ ոստիկանապետ Վալերի Օսիպյանը՝ պատասխանելով լրագրողների հարցին, թե ինչո՞ւ համաձայնեց ընդունել վարչապետ Նիկոլ Փաշինյանի՝ ոստիկանապետ դառնալու առաջարկը։

Օսիպյանը նաև ասաց, որ որոշում կայացնելուց առաջ նախկին ոստիկանապետ Վլադիմիր Գասպարյանի հետ առաջարկը չի քննարկել։

Նորանշանակ ոստիկանապետը նշեց՝ սկսելու է հանցավորության, կոռուպցիայի դեմ պայքարից։

«Ոստիկանության գործառույթները բազմաթիվ են, շատ են։ Պարոն վարչապետը խնդիրներ է դրել ոստիկանության առջև, առաջնահերթը դա հանցավորության դեմ պայքարն է, կոռուպցիան, կոռուպցիայի դեմ պայքարը, այ նման հարցերից ենք սկսելու», - ասաց Օսիպյանը՝ շարունակելով. - «Քանի որ ես մայրաքաղաքի արտաքին ծառայության պատասխանատուն եմ եղել, է՛լ ավելի շատ հասարակական անվտանգությունն ապահովելու խնդրով եմ զբաղված եղել, հիմա ի պաշտոնե է՛լ ավելի խորացված կզբաղվեմ էդ հարցով, և հույսով եմ, վստահեցնում եմ ձեզ՝ կոռուպցիան կվերանա»։
Ամբողջական հոդվածը  կարդացեք  այստեղ՝ https://www.azatutyun.am